प्रधानसेनापति रुक्माङ्गत कटवाललाई तत्काल कारबाहीको माग गर्दै  बुधबार राजधानी लगायत मुलुकका विभिन्न भागमा प्रदर्शन भएका समाचार प्राप्त भएका छन् ।
कटवाललाई कारबाहीको माग गर्दै काठमाडौँस्थित शान्तिवाटिकाबाट निस्किएको जुलुस बागबजार, पुतलिसडक, प्रदर्शनीमार्ग, सहिदगेट, न्युरोड, असन, भोटाहिटी हुँदै पुनः शान्तिवाटिकामा आएर सभामा परिणत भएको थियो ।
सभालाई सम्बोधन गर्दै अखिल नेपाल शिक्षक सङ्गठनका अध्यक्ष गुणराज लोहनीले प्रधानसेनापति कटवाल सामन्तवादको धरोहरको रुपमा रहेको बताउँदै उनलाई तुरुन्त कारबाहीको माग गर्नुभयो ।
अनेरास्ववियु -क्रान्तिकारी)का उपाध्यक्ष युवराज चौलागाईँले नेपाली सेनालाई प्रधानसेनापति कटवालले अझै शाही सेना बनाउन खोजेको आरोप लगाउनुभयो ।उहाँले आˆनो पार्टीले आदेश दिएमा आफूहरु जङ्गीअड्डा घेर्न तयार रहेको बताउनुभयो ।
सभामा अखिल नेपाल ट्रेड युनियन महासङ्घका महासचिव गणेश रेग्मीले महिनौँदिन आन्दोलन गरेर भएपनि प्रधानसेनापति कटवाललाई बर्खास्त गराइछाड्ने चेतावनी दिनुभयो ।
त्यसैगरी नागरिक शासनको सर्वोच्चताका लागि सरकारले प्रधानसेनापति कटवालसँग मागिएको स्पष्टीकरणको समर्थनमा एकिकृत नेकपा-माओवादी पर्साले बुधबार वीरगञ्जमा प्रदर्शन गरेको छ ।
स्थानीय घण्टाघरबाट निस्केको जुलुस माईस्थान, आदर्शनगर चौक, अलखियामठ हुदैं पुनः घण्टाघरमा पुगेर कोण सभामा परिणत भएको थियो ।
सो कोणसभालाई सम्वोद्धन गर्दै एकिकृत नेकपा- माओवादीका नेताहरुले नागरिक सरकारको निर्देशन पालना नगर्ने प्रधानसेनापति कटवाललाई कारवाही गर्न सरकारसँग आग्रह गरेको छ ।
नेपाली सेनालाई नागरिक प्रशासन अन्तर्गत नियन्त्रित र परिचालित हुनुपर्नेमा जोडदिदैं उनीहरुले भन्नुभयो- सेनालाई नागरिक सरकारको मातहतमा ल्याउन आˆनो पार्टीले जस्तोसुकै मूल्य चुकाउन तयार रहेको छ ।
बोल्ने नेताहरुमा एकिकृत नेकपा - माओवादी जिल्ला सङ्गठन समितिका सचिव विनोद काˆले, सह सचिवद्वय रामस्वरुप राम र योगेन्द्र साह - विभेद ), विशेष जिल्ला कमिटी सचिव हरिप्रसाद मण्डल तथा भोजपुरा मधेस राज्य समितिका सदस्य बलराम साह रहेका छन् ।
त्यस्तै एकीकृत नेकपा -माओवादी) को जनवर्गीय सङ्गठनले प्रधानसेनापति कटवाललाई बर्खास्त गर्न माग गर्दै दमौलीमा विरोध प्रदर्शन गरेका छन् ।
माओवादी जिल्ला पार्टी कार्यालयबाट निस्केको जुलुसमा नागरिक सर्वोच्चतालाई कायम गर, प्रधानसेनापति राजीनामा देजस्ता नारा लगाएका थिए ।
प्रदर्शनपछि दमौलीको ट्राफिक चोकमा आयोजित कोणसभामा बोल्दै अनेरास्ववियु -क्रान्तिकारी)का केन्द्रीय सदस्य ओमकुमारी पौडेल, वाइसिएल नेपालका जिल्ला अध्यक्ष सुबोध गौलीलगायतले बोल्नुभएको थियो
त्यसैगरी यसै विषयलाई लिएर मकवानपुरको हेटौडामा पनि जुलुस निकालियो ।  सेनापति कटवाललाई बर्खास्त गर्नुपर्ने मागसहित हेटौँडा नगरपालिका वडा नं. ३ स्थित एकीकृत माओवादीको कार्यालयबाट निस्केको जुलुस हेटौँडा बजार परिक्रमा गरी लोकतान्त्रिक चोकमा पुगी कोणसभामा परिणत भएको थियो ।कोणसभामा एकीकृत माओवादीका जिल्लास्तरीय नेताहरुले सम्बोधन गर्नुभएको थियो ।
त्यस्तै माओवादी जिल्ला सङ्गठन समिति सिन्धुपाल्चोकले पनि यही माग राखी विरोध जुलुस चौतारामा निकाल्यो ।
चौतारा बजार परिक्रमा गरी स्थानीय सहिद मञ्चमा पुगेर आयोजना गरिएको सभामा अन्तरिम व्यवस्थापिका-संसदका पूर्व सांसद भगवती प्रधान र एकीकृत माओवादीका केन्द्रीय सदस्य ध्रुवप्रसाद पराजुलीले जनताको अग्रगमनको चाहनालाई प्रतिगमनकारी तत्वले भाँजो हालेको बताउनुभयो ।
यता बुटवलमा स्थानीय भानुपार्कदेखि सुरु भएको विरोध जुलुस बुटवल बजार परिक्रमा गरी स्थानीय मिडियाचोकमा पुगेर सभामा परिणत भयो ।
प्रदर्शनमा भातृ सङ्गठनका नेता एवं कार्यकर्ताहरुले नागरिक सर्वोच्चतालाई सेनाले स्वीकार नगरेको उल्लेख गर्दै रायमाझी आयोगले दोषी किटान गरेकामाथि कारबाही गर्न माग गरेका थिए ।
सभामा माओवादी रुपन्देहीका सह-इन्चार्ज माधव शर्मालगायतले बोल्दै सरकारी निर्णयको समर्थन गर्नुभएको थियो ।
यसै विषयलाई लिएर एकीकृत माओवादीले लहानमा विरोध जुलुस निकाल्यो । एकीकृत माओवादी सिरहा क्षेत्र नं. १ र २ का क्षेत्रीय समितिद्वारा आयोजित सो जुलुस नगरपालिका परिक्रमा गरी सहिद चोकमा पुगी कोणसभामा परिणत भएको थियो ।कोणसभामा एकीकृत माओवादीका नेताहरु मुनीलाल साह, विशेश्वर राय, शोभराज लामा, सुरेन्द्रप्रसाद साहलगायतका वक्ताहरुले सम्बोधन गर्नुभएको थियो ।
त्यस्तै राज्यका अङ्गहरूले सरकारको निर्देशन नमानेको भन्दै एकीकृत नेकपा -माओवादी) र उसका भ्रातृ सङ्गठनहरूले बुधबार रोल्पामा विरोधसभा गरे । विरोधसभामा माओवादीका जिल्ला सहइन्चार्ज राजकुमार कक्षपतिले काठमाडौँमा संसदको रोस्टम घेरेर प्रधानसेनापतिलाई बचाउन नेकपा एमाले र नेपाली काङ्ग्रेस लागेको बताउनुभयो ।
उहाँले एमालेले कि त सरकार छाडुनुपर्ने कि त सरकारलाई पूर्ण सहयोग गर्नुपर्ने धारणा राख्नुभयो । अनेरास्ववियु -क्रान्तिकारी)का केन्द्रीय सदस्य रत्न महराले प्रधानसेनापति रुकमाङ्गद कटुवाल जनआन्दोलनका अपराधी भएको आरोप लगाउँदै उनमाथि कारबाही हुनुपर्ने माग गर्नुभयो।माओवादीका जिल्ला सदस्य एवम् लिवाङ एरिया समितिका इन्चार्ज पूर्ण केसीले सरकारलाई असहयोग गर्ने, तर सरकार भने नछाड्ने प्रवृत्ति निन्दनीय भएको बताउनुभयो

---